Egg geymast best í kæli.
Látið mjórri endann á egginu snúa niður.
Ný egg henta illa til suðu. Skurninn losnar illa af. Best er að láta egg vera orðin 7 – 10 daga gömul til að hægt sé að ná skurninu af eftir suðu.
Suðutími eggja:
Linsoðin 3 - 4 mín.
Mjúksoðin 6 - 7 mín.
Harðsoðin 10 - 12 mín.

Ýmislegt um egg frá húsfreyjunni á Efri - Mýrum
Sennnilega hafa hænsni verið í farteski landnámsmanna á Íslandi og lengst af verið það sem ég hef kallað heimilishænsn. 6 - 10 - 15 púddur á bæ, þar af einn hani til fjölgunar. Þetta gátu verið mislynd grey, hanarnir illir og hænurnar gjarnar á að fela eggin og liggja á þeim (unga út) þegar húsmæðurnar þurftu alveg nauðsynlega á hverju eggi að halda. En egg voru nauðsyn. Aldrei var jólakakan jafngóð ef í hana vantaði eggin, að ég tali nú ekki um annan bakstur. Enda var reynt að geyma egg frá því seint á haustin og fram í desember, svo að væri nú hægt að baka jólabaksturinn.
Stærð þeirra skiptir líka máli. Allar þær uppskriftir sem ég hef glímt við um dagana gera ráð fyrir meðaleggi. Sú merka matreiðslubók, Matur og drykkur, eftir Helgu Sigurðardóttur segir fyrsta flokks eggið vera á bilinu 40-55 grömm. Því hlýtur að vera að uppskriftir hennar í þessari firnaþykku bók geri ráð fyrir þessari þyngd eggjanna.
Til gamans ætla ég að láta það fylgja hér að þessi bók var fyrsta jólagjöfin sem Gísli gaf mér og það var meir en gaman að sjá svipinn á föður mínum það aðfangadagskvöldið. En áfram með stærð eggja. Í venjulegri uppskrift að t.d. rjómatertubotnum er gert ráð fyrir 4 eggjum og af biturri reynslu veit ég að þau eiga að vera svona meðalegg að þyngd, EKKI yfir 90 grömm hvert. Elsta dóttirin fæst til að votta þetta líka, hún var eitt sinn að baka smákökur sem hún kallaði túkalla og voru alltaf bakaðir af mömmu fyrir jólin, hún notaði fjögur stór egg, afleiðingin varð eitthvað sem hún kallaði hundraðkalla og flæddi um alla plötuna og festist saman. Ég hef líka oft skemmt mér á kostnað annarra þegar fólk er að kvarta undan gömlum eggjum, það hafi verið ómögulegt að ná utanaf þeim skurninum. Þarna er ekki ástæðan of gömul egg, heldur of ný. Það er staðreynd að ný egg eru óþolandi í potti, þau þurfa að lágmarki að vera orðin viku, tíu daga gömul. Eins þótt eigi að steikja þau, glæný egg fljóta um pönnuna og eru leiðinlega skotgjörn….svo mann brennir sig við eldamennskuna og engum finnst það gott.
Þau geymast betur ef mjórri endinn snýr niður, er eitthvað sem áralöng reynsla hefur kennt mér og geymast líka ótrúlega lengi í góðum ísskáp eða kæli.

Halla Jökulsdóttir